മൂന്നാറില്‍ കൈയേറ്റക്കാര്‍ക്കെതിരെ ശക്തമായ നിലപാട് സ്വീകരിച്ച ദേവികുളം സബ് കളക്ടര്‍ ശ്രീറാം വെങ്കിട്ടരാമനെ സര്‍ക്കാര്‍ അവിടെ നിന്ന് ഒഴിപ്പിച്ചു. ‘നമുക്കൊരുമിച്ച് കൈയേറാം, സര്‍ക്കാര്‍ ഒപ്പമുണ്ട്’ എന്നതു പോലായി കാര്യങ്ങള്‍. ഇക്കാര്യത്തില്‍ സര്‍ക്കാര്‍ നിലപാടിനെതിരെ നിലയുറപ്പിച്ചവരുടെ കൂട്ടത്തില്‍ ഈയുള്ളവനും ഉള്‍പ്പെടുന്നു –ശ്രേഷ്ഠയും ശ്രീറാമും അദീലയും ഇരകളാണ്. എന്നാല്‍, ശ്രീറാമിന് അര്‍ഹതപ്പെട്ട സ്ഥാനക്കയറ്റം നല്‍കുക മാത്രമാണ് ചെയ്തത് എന്ന വാദമാണ് ന്യായീകരണ തൊഴിലാളികള്‍ ഉന്നയിച്ചത്. ന്യായീകരണം പല വിധത്തിലുണ്ടായി. ഒരുദാഹരണം ഇതാ.

ശ്രീറാം വെങ്കിട്ടരാമന്‍ ഒഴികെ അദ്ദേഹത്തിന്റെ ബാച്ചിലെ 12 പേരേയും പ്രമോഷന്‍ നല്‍കി സ്ഥലം മാറ്റുകയും ശ്രീറാമിനെ ദേവികുളത്ത് നിലനിര്‍ത്തുകയും ചെയ്താല്‍ പ്രചാരണം ഈ വിധമായേനെ: ‘ശ്രീറാമിനെതിരെ പ്രതികാര നടപടി; അര്‍ഹമായ സ്ഥാനക്കയറ്റം തടഞ്ഞു…’

ആദ്യഘട്ട അന്വേഷണത്തില്‍ തന്നെ ഈ വാദം പച്ചക്കള്ളമാണെന്നു ബോദ്ധ്യമായിരുന്നു. പുതിയ നിയമന ഉത്തരവ് ഔദ്യോഗികമായി പുറത്തു വന്നിട്ട് വിശദമായ മറുപടി കൊടുക്കാം എന്നു കരുതി. G.O (Rt) No.4210/2017/GAD നമ്പരിലുള്ള ഉത്തരവ് ജൂലൈ 6 തീയതിയില്‍ പുറത്തിറങ്ങി. ഈ ഉത്തരവ് വായിച്ചു നോക്കുമ്പോള്‍ ഒരാളുടെ മുഖംമൂടി അഴിഞ്ഞു വീഴുന്നുണ്ട്. മറ്റാരുടേതുമല്ല, റവന്യൂ മന്ത്രി ഇ.ചന്ദ്രശേഖരന്റെ.

മുഖ്യമന്ത്രി പിണറായി വിജയനും റവന്യൂ മന്ത്രി ഇ.ചന്ദ്രശേഖരനും

ശ്രീറാമിനെ മാറ്റാനുള്ള മന്ത്രിസഭാ തീരുമാനത്തെ ചന്ദ്രശേഖരന്‍ ന്യായീകരിച്ചത് ഇത് ഭരണപരമായ നടപടി മാത്രമാണെന്നു പറഞ്ഞായിരുന്നു. എംപ്ലോയ്‌മെന്റ് ഡയറക്ടറായുള്ള ശ്രീറാമിന്റെ മാറ്റം സാധാരണ നടപടിയാണ്. 2013 ബാച്ചിലെ ഐ.എ.എസ്. ഉദ്യോഗസ്ഥരായ ആരും ഇപ്പോള്‍ സബ് കളക്ടര്‍ തസ്തികയിലില്ല. അതുകൊണ്ട് ഉയര്‍ന്ന തസ്തികയിലേക്ക് മാറ്റി എന്നായിരുന്നു വിശദീകരണം. അതുവരെ ചന്ദ്രശേഖരന്‍ സ്വീകരിച്ചിരുന്ന നിലപാടില്‍ നിന്ന് തീര്‍ത്തും വ്യത്യസ്തമായിരുന്നു ഇത്. മൂന്നാറില്‍ എല്‍.ഡി.എഫ്. സര്‍ക്കാരിന്റെ നയം നടപ്പാക്കുന്ന ഉദ്യോഗസ്ഥരെ ഒരു കാരണവശാലും മാറ്റാന്‍ സമ്മതിക്കില്ലെന്നായിരുന്നു അദ്ദേഹത്തിന്റെയും അദ്ദേഹത്തിന്റെ പാര്‍ട്ടിയായ സി.പി.ഐയും ആവര്‍ത്തിച്ചിരുന്നത്. രാഷ്ട്രീയക്കാരുടെ താലപര്യങ്ങള്‍ക്കനുസരിച്ച് ഉദ്യോഗസ്ഥരെ അങ്ങോട്ടുമിങ്ങോട്ടും മാറ്റാനാവില്ല എന്നും പ്രഖ്യാപിച്ചു.

ശ്രീറാമിനെ സ്ഥലം മാറ്റിക്കൊണ്ടുള്ള ഉത്തരവ്

ശ്രീറാമിനെ സ്ഥലം മാറ്റാനുള്ള മന്ത്രിസഭാ യോഗ തീരുമാനത്തിന്റെ മിനുട്ട്‌സ്

ഇപ്പോഴത്തെ നടപടിയുടെ ക്ഷീണം ചന്ദ്രശേഖരനു തന്നെയാണ്.  ശ്രീറാമിനെ മാറ്റിക്കൊണ്ടുള്ള ഉത്തരവ് ആ ക്ഷീണം അടിവരയിടുന്നു. 2013ലെ കേരള കേഡര്‍ ഐ.എ.എസ്. ഉദ്യോഗസ്ഥനായ ദേവികുളം സബ് കളക്ടര്‍ ശ്രീറാം വിയെ എംപ്ലോയ്‌മെന്റ് ആന്‍ഡ് ട്രെയ്‌നിങ് ഡയറക്ടറായി മാറ്റി നിയമിക്കുന്നു എന്നാണ് ഉത്തരവിലുള്ളത്. പ്രമോഷന്‍ അഥവാ സ്ഥാനക്കയറ്റം എന്ന വാക്ക് ഉത്തരവില്‍ ഒരിടത്തുമില്ല. മാത്രമല്ല, സ്ഥാനക്കയറ്റമാണ് നല്‍കിയതെങ്കില്‍ പുതിയ ശമ്പള സ്‌കെയിലിനെക്കുറിച്ച് വ്യക്തമായ സൂചന ഉത്തരവില്‍ ഉണ്ടാവണം. ജൂലൈ 6ന്റെ ഉത്തരവില്‍ അത് ഇല്ലേയില്ല. ഇതു സംബന്ധിച്ച മന്ത്രിസഭാ യോഗ തീരുമാനത്തിന്റെ മിനുട്ട്‌സിലും സ്ഥാനക്കയറ്റമില്ല.

ശ്രീറാം വെങ്കിട്ടരാമന്‍

യഥാര്‍ത്ഥത്തില്‍ ശ്രീറാമിന് 7 മാസം മുമ്പു തന്നെ സ്ഥാനക്കയറ്റം ലഭിച്ചിരുന്നു. 2013 ബാച്ചിലെ മറ്റ് ഐ.എ.എസ്. ഓഫീസര്‍മാര്‍ക്കൊപ്പം 2017 ജനുവരി 1ന് ശ്രീറാമും സീനിയര്‍ ഗ്രേഡ് സബ് കളക്ടറായി. 4 വര്‍ഷം സേവനകാലയളവ് പൂര്‍ത്തിയാവുമ്പോഴാണ് ഐ.എ.എസ്. ഉദ്യോഗസ്ഥര്‍ക്ക് സീനിയര്‍ ഗ്രേഡ് ശമ്പളം ലഭിക്കുന്നത്. സര്‍വ്വീസിന്റെ 4 മുതല്‍ 7 വരെയുള്ള വര്‍ഷങ്ങളില്‍ അവര്‍ ഈ ഗ്രേഡില്‍ ഇതേ ശമ്പളം തന്നെ വാങ്ങും, സ്ഥാനക്കയറ്റമില്ല എന്നര്‍ത്ഥം. ഈ കാലയളവില്‍ സബ് കളക്ടറായിട്ടോ ഏതെങ്കിലും വകുപ്പിന്റെ ഡയറക്ടറായിട്ടോ വേണമെങ്കില്‍ കളക്ടറായിട്ടോ നിയമിക്കപ്പെടാം. കളക്ടര്‍ നിയമനത്തിന് സര്‍വ്വീസിലെ സീനിയോറിറ്റി മാനദണ്ഡമായി വരുമെന്നു മാത്രം.

ശ്രീറാം വെങ്കിട്ടരാമന്‍ മൂന്നാറില്‍ കൃത്യനിര്‍വ്വഹണത്തിനിടെ

2017 ജനുവരിയില്‍ സ്ഥാനക്കയറ്റം ലഭിച്ച ശ്രീറാമിന് അടുത്ത സ്ഥാനക്കയറ്റത്തിന് അര്‍ഹതയുണ്ടാവുക 2020 ജനുവരിയില്‍ മാത്രമാണ്. അപ്പോള്‍ സ്ഥാനക്കയറ്റം നല്‍കാനും വലിയ അനീതി ഒഴിവാക്കാനുമാണ് ശ്രീറാമിനെ എംപ്ലോയ്‌മെന്റ് ആന്‍ഡ് ട്രെയ്‌നിങ് ഡയറക്ടറാക്കിയത് എന്നു വാദിക്കുന്നവര്‍ക്ക് നല്ല നമസ്‌കാരം. മന്ത്രിസഭാ യോഗത്തിന്റെ അജന്‍ഡയ്ക്കു പുറത്തുള്ള ഇനമായി കൊണ്ടുവന്ന് ശ്രീറാമിനോടുള്ള സ്‌നേഹം സര്‍ക്കാര്‍ പ്രകടിപ്പിച്ചത് എന്തിനെന്ന് പച്ചവെള്ളം കുടിക്കുന്നവര്‍ക്കെല്ലാം മനസ്സിലാകും.

ഇവിടെ റവന്യൂ മന്ത്രിയാണ് പ്രതിക്കൂട്ടിലെങ്കിലും അദ്ദേഹം ഒരു പ്രതീകം മാത്രമാണ്. സര്‍ക്കാരിനു വേണ്ടി പാപഭാരം ചുമക്കുന്ന പ്രതീകം. ശ്രീറാമിനെ മാറ്റിയതിനെ ന്യായീകരിക്കുന്നതിനു പകരം ‘എല്ലാം മുഖ്യമന്ത്രി പറയും’ എന്നു പറഞ്ഞിരുന്നെങ്കില്‍ ചന്ദ്രശേഖരന്റെ കൈകളില്‍ പാപക്കറ പുരളില്ലായിരുന്നു. ആ വിവേകം അദ്ദേഹം കാണിച്ചില്ല. റവന്യൂ മന്ത്രിക്ക് തീര്‍ച്ചയായും അങ്ങനെ പറയാം. മന്ത്രിസഭയുടെ കൂട്ടുത്തരവാദിത്വത്തെ ബാധിക്കില്ല. പേഴ്‌സണല്‍ മന്ത്രാലയത്തിന്റെ ചുമതലക്കാരന്‍ എന്ന നിലയില്‍ സംസ്ഥാനത്തെ ഐ.എ.എസ്., ഐ.പി.എസ്., ഐ.എഫ്.എസ്. ഉദ്യോഗസ്ഥരുടെ സ്ഥലംമാറ്റം മുഖ്യമന്ത്രിയുടെ ഉത്തരവാദിത്വമാണല്ലോ!!

FOLLOW
  •  
    847
    Shares
  • 797
  • 23
  •  
  • 27
  •  
  •